Korrontzi folk musika taldea Agus Barandiaran trikitilariak sortu zuen 2004ean. Bere helburua, euskal musika herrikoiari zein bere lurraldeko antzinako hots tradizionalei beste ikuspuntu moderno eta garaikideago bat ematea da. Beti ere trikitixa musikan oinarritutako ikuspuntu batetik, beronekin batera txalaparta edo alboka bezalako beste instrumentu tradizional batzuk ardatz hartuta.
Korrontzi herri tradizioari buruzko hausnarketa kementsua, dinamikoa eta ikusgarria da, erritmo eta dantza garaikidearen ukituekin.
Korrontzik hamar disko argitaratu ditu eta sari eta aipamen ugari jaso ditu, hala nola, ‘Eurofolk Europako Banda Onenaren Saria’(2009), ‘World Music Charts’ (2014, 2015, 2016 eta 2019), ‘Top100 Roots Music Report’ (2015), ‘Womex Official Selection’ (2014 eta 2019), ‘Etxepare Euskal Institutua Saria’ Musika Bulegoa sarietan egindako ibilbide osoari eskainitakoa(2021), besteak beste.
Taldeak haien musika eta dantza herrialde askotatik eraman du, jaialdi handietan eta hainbat lekutan joz, hala nola AEB, Irlanda, Brasil, Malaysia, Holanda, Grezia, Italia, Kanada, Hungaria, Portugal, Ingalaterra, Zipre, Maroko, Alemania, Kroazia, Cabo Verde, Eslovenia, Austria, Turkia, Reunion uhartea eta abar. Nazioarteko prentsak "Korrontzi bizitzan noizbait ikusi beharreko talde horietakoa da" definizioa jaso du.
